ශ්‍රී ලංකා නාවික හමුදාව, අනුරාධපුර ආහාර සහ ඖෂධ පරීක්ෂක ඒකකය හා එක්ව 2023 අගෝස්තු මස 14 වන දින මැදවච්චිය, රෝහල ඉදිරිපිට සිදුකළ විශේෂ සෝදිසි මෙහෙයුමකදී, ඖෂධ අලෙවි සැලක නීති විරෝධි ලෙස අලෙවි කිරීම සඳහා සුදානම්කර තිබූ Pregabalin Capsules 150 mg වර්ගයේ ඖෂධ පෙති එකොලොස්දහස් තුන්සිය හැත්තෑ හතක (11377) ප්‍රමාණයක් සමඟ සැකකරුවෙකු (01) නීතියේ රැහැනට හසුකර ගැනීමට කටයුතු කෙරිණි.

ශ්‍රී ලංකා නාවික හමුදාව, කල්පිටිය සෙරක්කුලිය වෙරළ ප්‍රදේශය ආශ්‍රිතව 2023 අගෝස්තු මස 12 වන දින සිදුකල විශේෂ පාමුර සංචාරයක් හා සෝදිසි මෙහෙයුමක් මඟින්, එම වෙරළ ප්‍රදේශය‍ට පාවී ආ බීඩි කොළ කිලෝග්‍රෑම් තුන්සිය දහඅටක (318) පමණ තොගයක් (තෙත බර සහිත) නාවික හමුදා භාරයට ගැනීමට කටයුතු කෙරිණි.

කොළඹ සමුද්‍රීය මුදවාගැනීම් සම්බන්ධීකරණ මධ්‍යස්ථානයේ සම්බන්ධීකරණයෙන්, ගාල්ල ප්‍රදීපාගාරයේ සිට නාවික සැතපුම් 58 ක් පමණ (කිලෝ මීටර් 107 ක් පමණ) දුරින්, ශ්‍රී ලංකාවට බටහිර දෙසින් වූ ගැඹුරු මුහුදේදී, ගිනි ගැනීමට ලක් වූ මෙරට බහුදින ධීවර යාත්‍රාවක සිටි ධීවරයින් මුදවාගැනීම සඳහා ශ්‍රී ලංකා නාවික හමුදාව, 2023 අගෝස්තු මස 11 වන දින සිදුකල විශේෂ සෙවීමේ හා මුදවා ගැනීමේ මෙහෙයුම මඟින්, නිරුපද්‍රිතව මුදවාගත් මෙරට ධීවරයින් හත් දෙනා (07) ශ්‍රී ලංකා නාවික නෞකා ගජබාහු නෞකාව මඟින් අද දින (2023 අගෝස්තු 12) ගාල්ල වරාය වෙත රැගෙන ඒමට කටයුතු කෙරිණි.

ශ්‍රී ලංකා නාවික හමුදාව, කල්පිටිය කළපුවේ මට්ටතිව් දූපතට අසල මුහුදු ප්‍රදේශයේ 2023 අගෝස්තු මස 11 වන දින සිදුකල විශේෂ සෝදිසි මෙහෙයුමක් මඟින්, එම කලපුව ඔස්සේ නීති විරෝධි ලෙස මෙරටට රැගෙන ඒමට උත්සාහ කල බීඩි කොළ කිලෝග්‍රෑම් පන්සිය පනස් එකක (551) පමණ තොගයක් (තෙත බර සහිත) රැගත් ඩිංගි යාත්‍රා දෙකක් (02) සමඟ සැකකරුවන් සිව් දෙනෙකු (04) නාවික හමුදා භාරයට ගැනීමට කටයුතු කෙ‍රිණි.

පුත්තලම කලපුවේ, ඉප්පන්තිව් දූපතට ඔබ්බෙන් වූ වෙරළ තීරයේ අතරමංව සිටි මින්කිවේල් වර්ගයේ අඩි 20 ක් පමණ දිගින් යුත් තල්මසෙකු නැවත නිරුපද්‍රිතව ගැඹුරු මුහුද වෙත මුදා හැරීම සඳහා ශ්‍රී ලංකා නාවික හමුදාව අද දින (2023 අගෝස්තු 08) කටයුතු කෙරිණි.

මෙරට මුහුදු සීමාව තුළ අනවසර ධීවර කටයුතු සිදුකළ ඉන්දීය ධීවර යාත්‍රා මෙරට මුහුදු සීමාවෙන් ඔබ්බට පලවා හැරීම සඳහා ශ්‍රී ලංකා නාවික හමුදාව විසින් අද දින (2023 අගෝස්තු 07) අළුයම මුලතිව් අලම්පිල් ප්‍රදේශයට ඔබ්බෙන් වූ මෙරට මුහුදු ප්‍රදේශයේ සිදුකළ විශේෂ මෙහෙයුමක් මඟින්, මෙරට මුහුදු සීමාව තුළ අනවසර ධීවර කටයුතු සිදු කරමින් සිටි ඉන්දීය ධීවර යාත්‍රාවක් (01) සමඟ ඉන්දීය ධීවරයින් දස දෙනෙකු (10) නාවික හමුදා භාරයට ගැනීමට කටයුතු කෙරිණි.

ශ්‍රී ලංකා නාවික හමුදාව, ශ්‍රී ලංකා පොලීසිය හා එක්ව යාපනය පොන්නාලෛයි ප්‍රදේශයේ 2023 අගෝස්තු මස 05 වන දින සිදුකල විශේෂ සෝදිසි මෙහෙයුමක් මඟින් කේරළ ගංජා කිලෝග්‍රෑම් දෙසිය විසිහතකට (227) අධික තොගයක් සමඟ සැකකරුවෙකු (01) සහ ලොරි රථයක් (01) නීතියේ රැහැනට හසුකර ගැනීමට කටයුතු කෙරිණි.

ශ්‍රී ලංකා නාවික හමුදාව, ත්‍රීකුණාමලය නිලාවේලි සහ ලංකාපටුන වෙරළ ප්‍රදේශයන්හි 2023 අගෝස්තු මස 03 සහ 04 යන දිනයන්හි සිදු කල විශේෂ සෝදිසි මෙහෙයුම් මඟින් රාත්‍රී කාලයේ නීති විරෝධී ලෙස පුපුරණ ද්‍රව්‍ය භාවිතයෙන් ධීවර කටයුතු සිදුකළ සහ නීති විරෝධී ලෙස රාත්‍රී කිමිදුම් කටයුතු සිදුකළ පුද්ගලයින් දහ දෙනෙකු (10), නීති විරෝධී ලෙස අල්ලන ලද මත්ස්‍යයන් හා මුහුදු කූඩැල්ලන් එකසීය දහසයක (116) ප්‍රමාණයක් සමඟ ඩිංගි යාත්‍රා තුනක් (03) සහ කිමිදුම් උපකරණ නාවික හමුදා භාරයට ගැනීමට කටයුතු කෙරිණි.

ශ්‍රී ලංකා නාවික හමුදාව පුත්තලම, සේරක්කුලිය වෙරළ ප්‍රදේශයේ අද දින (2023 අගෝස්තු 04) අළුයම් කාලයේදී සිදුකල විශේෂ සෝදිසි මෙහෙයුමක් මඟින් එම වෙරළ ප්‍රදේශය වෙත නීති විරෝධි ලෙස රැගෙනවිත් ප්‍රවාහනය කිරීමට සූදානම් කරමින් තිබූ බීඩි කොළ කිලෝග්‍රෑම් හැත්තෑ පහක (75) පමණ තොගයක් (තෙත බර සහිත) සමඟ සැකකරුවෙකු (01) නාවික හමුදා භාරයට ගැනීමට කටයුතු කෙ‍රිණි.

ශ්‍රී ලංකා නාවික හමුදාව කුච්චවේලි පොලීසිය හා එක්ව, ත්‍රීකුණාමලය ජයනගර් ප්‍රදේශයේ සහ පොඩුවාකට්ටු මුහුදු ප්‍රදේශයෙහි 2023 ජුලි මස 31 සහ 2023 අගෝස්තු මස 03 වන දින සිදුකළ විශේෂ සෝදිසි මෙහෙයුම් මඟින්, එම ප්‍රදේශයන්හී සූක්‍ෂම ‍ලෙස සඟවා තිබූ වාණිජ පුපුරණ ද්‍රව්‍ය කූරූ පහක් (05), සකසන ලද පුපුරණ ද්‍රව්‍ය කොටස් දහ හතරක් (14) සහ විදුලි නොවන ඩෙටර්නේටර් දහ හතක් (17) සමඟ සැකකරුවෙකු (01) නීතියේ රැහැනට හසුකර ගැනීමට කටයුතු කෙරිණි.